Sulmet izraelite në spitalin Nasser në Gaza të hënën vranë të paktën 15 persona, përfshirë katër gazetarë, njëri prej të cilëve punonte për agjencinë e lajmeve Reuters, thanë zyrtarët palestinezë të shëndetësisë. Kameramani Hussam al-Masri, u vra në sulmin e parë, sipas zyrtarëve. Fotografi Hatem Khaled, i cili gjithshtu punonte për Reuters, u plagos në një sulm të dytë në spital. Dëshmitarët thanë se sulmi i dytë ndodhi pasi punonjësit e shpëtimit, gazetarët dhe njerëz të tjerë kishin vrapuar drejt vendit ku u krye sulmi i parë. Transmetimi i drejtpërdrejtë video i Reuters nga spitali u mbyll papritur në momentin e sulmit. Ushtria izraelite dhe Zyra e Kryeministrit Benjamin Netanyahu nuk kanë bërë asnjë koment në lidhje me sulmet. Zyrtarët e shëndetësisë në Gaza thanë se tre gazetarët e tjerë të vrarë punonin për Associated Press dhe Al Jazeera. Një punonjës i skuadrave të shpëtimit ishte gjithashtu mes të vrarëve. Më shumë se 240 gazetarë palestinezë janë vrarë nga zjarri izraelit në Gaza që nga fillimi i luftës më 7 tetor 2023, sipas Sindikatës së Gazetarëve Palestinezë.