Disa sulme ajrore izraelite kanë marrë në shënjestër periferinë e Damaskut mëngjesin e të martës, duke shkaktuar “dëme materiale”, raportoi media shtetërore siriane. Agjencia shtetërore e lajmeve, SANA, duke cituar një zyrtar të paidentifikuar të ushtrisë, tha se sulmet erdhën nga drejtimi i Lartësive të Golanit, që janë të pushtuara nga Izraeli. Sipas medias shtetërore siriane, sulmet u kryen rreth orës 04:30 të mëngjesit të së martës. Vëzhguesi sirian për të drejtat e njeriut, monitorues i luftës me seli në Britani, raportoi se sulmet ajrore kanë goditur një njësi të artilerisë së ushtrisë siriane, ku anëtarët e grupit militant libanez, Hezbollah, po ashtu janë të vendosur. Izraeli për vite me radhë ka kryer sulme në pjesët që kontrollohen nga Qeveria në Siri. Në raste të rralla ai pranon se qëndron prapa sulmeve dhe Izraeli ka thënë se shënjestron grupet e mbështetura nga Irani që gjenden në Siri dhe të cilat mbështesin Qeverinë e presidentit Bashar al-Assad.