Numri i viktimave civile nga dy sulme ajrore izraelite në Liban është rritur në dhjetë, raportoi media shtetërore të enjten. Sulmet u kryen një ditë më parë dhe janë më vdekjeprurëset në më shumë se katër muaj të shkëmbimit të zjarrit ndërkufitar mes Izraelit dhe grupit Hezbollah. Grupi militant libanez, Hezbollah, u zotua se do të hakmerret për sulmet, të cilat goditën qytetin Nabatijeh dhe një fshat në jug të Libanit, pak orë pasi predhat e hedhura nga Libani vranë një ushtar izraelit. Në Nabatijeh, sulmet izraelite dëmtuan një ndërtesë, duke vrarë shtatë anëtarë të të njëjtës familje, përfshirë një fëmijë raportoi media shtetërore libaneze. Fillimisht, pas sulmeve ishte raportuar për katër viktima. Ndërkaq, në fshatin Suaneh, një grua dhe dy fëmijët e saj u vranë. Edhe luftëtarë të Hezbollahut janë vrarë po ashtu gjatë sulmeve izraelite. Hezbollahu dhe ushtria izraelite shkëmbejnë zjarr në kufi që nga 7 tetori, kur nisi lufta në Gazë mes Izraelit dhe Hamasit. Kjo ka bërë që të rritet frika për një zgjerim të konfliktit në lindjen e mesme që do të kishte pasoja të rënda në të gjithë botën.