Izraeli tha të dielën se do të vononte lirimin e qindra të burgosurve palestinezë që kishte planifikuar t'i lironte një ditë më parë derisa grupi militant Hamas të përmbushë kushtet e tij, duke nënvizuar kështu brishtësinë e marrëveshjes së armëpushimit të Gazës. Zyra e kryeministrit Benjamin Netanyahu lëshoi një deklaratë në orët e para të së dielës duke thënë se Izraeli kishte ndalur dorëzimin e 620 të burgosurve dhe paraburgosurve palestinezë "derisa të sigurohet lirimi i pengjeve të radhës pa ceremoni poshtëruese". Kjo ishte një referencë për dorëzimet e fundit nga Hamasi që zyrtarët e OKB-së kanë thënë se bien ndesh me ligjin ndërkombëtar. Hamasi ka bërë që pengjet të dalin në një skenë para turmave dhe ndonjëherë edhe të flasin atje, para se të dorëzohen. Arkivolet me trupat e pajetë të pengjeve po ashtu janë mbartur mes turmave. Njoftimi i Izraelit, i cili gjithashtu akuzoi Hamasin për shkelje të përsëritur të armëpushimit njëmujor, erdhi pasi grupi militant palestinez të shtunën dorëzoi gjashtë pengje si pjesë e një shkëmbimi për të cilin ishte rënë dakord në marrëveshjen e armëpushimit.