Izraeli u kualifikua në finalen e madhe të festivalit evropian të këngës, Eurovizion, që do të mbahet këtë fundjavë, ndërsa mijëra demonstrues marshuan në Malmo të Suedisë të enjten për të protestuar kundër pjesëmarrjes së tij, për shkak të luftës në Gaza. Këngëtarja Eden Golan performoi këngën e saj "Hurricane" në gjysmëfinalen e dytë të së enjtes pa incidente para 9,000 shikuesve në Malmo Arena dhe rezervoi vendin e saj në finalen e së shtunës pas një televotimi. Më herët gjatë ditës, më shumë se 10,000 njerëz, përfshirë aktivisten e klimës, Greta Thunberg, u mblodhën në sheshin kryesor të Malmos dhe marshuan në rrugët e qytetit. “Unë jam një fanse e Eurovizionit dhe me zemër të thyer po e bojkotoj atë”, tha për AFP një protestuese 30-vjeçare. "Nuk mund të argëtohem duke e ditur se Izraeli është aty duke marrë pjesë kur të gjithë ata fëmijë po vdesin në Gaza. Mendoj se është thjesht e gabuar."