Një seri sulmesh ajrore ka lënë të vrarë të paktën 32 persona në gjithë Qytetin e Gazës, raportoi stafi mjekësor të dielën. Në mesin e viktimave ishin edhe 12 fëmijë, sipas spitalit al Shifa, ku u dërguan trupat e viktimave. Një nga sulmet ajrore, që u kryen gjatë natës dhe në orët e para të mëngjesit, goditi një shtëpi në lagjen Sheik Radvan, duke vrarë një familje me 10 anëtarë, përfshirë një nënë me tre fëmijët e saj, thanë zyrtarët shëndetësorë. Asociacioni palestinez i Futbollit tha se lojtari i klubit Al-Helal, Mohammed Ramez Sultan u vra gjatë sulmeve së bashku me 14-anëtarë të familjes së tij. Ushtria izraelite ende nuk ka komentuar këto sulme. Ditët e fundit, Izraeli ka intensifikuar sulmet ajrore në mbarë Qytetin e Gazës, duke shkatërruar ndërtesa shumëkatëshe dhe duke akuzuar Hamasin se ka vendosur pajisje për vëzhgim në to. Izraeli ka thënë se synon të marrë kontrollin e plotë të Qytetit të Gazës, zonës më të madhe urbane në Rripin e Gazës, ku, sipas Kombeve të Bashkuara jetojnë 1 milion persona dhe ku është shpallur gjendje e urisë. Një ditë më parë, ushtria tha se kishte goditur një ndërtesë shumëkatëshe në Qytetin e Gazës që pretendoi se përdorej nga Hamasi. Izraeli ka urdhëruar banorët që të largohen nga Qyteti i Gazës për shkak të ofensivës. Që nga fillimi i luftës në gaza, dy vite më parë, janë vrarë më shumë se 64.000 palestinezë, sipas Ministrisë së Shëndetësisë në Gazë, shifra që konsiderohen të besueshme nga OKB-ja.