Izraeli ka zyrtarizuar tashmë refuzimin e asaj që e quan “njohje e njëanshme” e një shteti palestinez dhe ka shtuar se një marrëveshje e mundshme duhet të arrihet vetëm nëpërmjet negociatave të drejtpërdrejta. Për kryeministrin izraelit ndërkohë, nuk ka më kuptim as vazhdimi i bisedimeve me Hamasin. Bisedimet e ndërmjetësuara nga Katari, Egjipti dhe Shtetet e Bashkuara nuk kanë arritur deri më tani të sigurojnë një pauzë në luftimet në Gazë. Kryeministri Benjamin Netanyahu, njohu me qëndrimin kaninetin qeveritar, dhe ky i fundit e miratoi atë unanimisht. “Për shkak të ideve të reja të komunitetit ndërkombëtar për një përpjekje për t’i imponuar Izraelit në mënyrë të njëanshme një shtet palestinez, sot po paraqes për miratim nga qeveria një deklaratë vendimmarrëse për këtë çështje. Jam i sigurt se do të pranohet gjerësisht”, tha kryeministri Netanyahu. Deklarata zyrtare reflekton qëndrimin e Izraelit ndaj atij që e quan imponim për një shtet palestinez. Në deklaratë thuhej: Izraeli refuzon kategorikisht diktatin ndërkombëtar në lidhje me një marrëveshje të përhershme me palestinezët. Një marrëveshje e tillë do të arrihet vetëm nëpërmjet negociatave të drejtpërdrejta me palët, pa parakushte. Izraeli do të vazhdojë ta kundërshtojë njohjen e njëanshme të një shteti palestinez. Një njohje e tillë pas masakrës së 7 tetorit do t’i dhuronte terrorizmit një shpërblim të jashtëzakonshëm dhe të paprecedentë dhe do të pengonte një marrëveshje të ardhshme për paqen”.