Izraeli ende po lufton me Hamasin në Gazë që nga 7 tetori i vitit të kaluar. Por, ka hapur edhe një front të ri kundër Hezbollahut në Liban, pasi palët kanë këmbyer zjarr përgjatë kufirit që nga nisja e luftës në Gazë. Izraeli është zotuar se do të godasë edhe Iranin, që mbështet Hezbollahun dhe Hamasin, pasi Teherani kreu sulme me raketa balistike ndaj Izraelit javën e kaluar. Grupet militante që mbështeten nga Irani në Siri, Irak dhe Jemen, po ashtu kanë kryer sulme ajrore nga distanca kundër Izraelit. Sulmi në Gazë mëngjesin e të dielës goditi një xhami ku po strehoheshin personat e zhvendosur. Xhamia gjendet afër spitalit kryesor në Deir al-Balah. Izraeli tha se kishte shënjestruar një qendër komande dhe kontrolli të Hamasit, por nuk dha dëshmi për këtë pretendim. Ushtria izraelite po ashtu njoftoi për një ofensivë të re tokësore dhe ajrore në Xhabalia, në veri të Gazës, ku gjenden kampe të mbipopulluara refugjatësh, që janë krijuar që nga lufta e vitit 1948, rreth kohës të krijimit të Izraelit. Ushtria tha se forcat izraelite kanë rrethuar Xhabalian, ndërsa avionët luftarakë po godasin shënjestrat e Hamasit, para se trupat të avancojnë. Që kur nisi lufta në Gazë, Izraeli ka kryer disa operacione të mëdha në Xhabalia. Izraeli po ashtu ka lëshuar urdhra të rinj për evakuim në veri të Gazës, që kryesisht është zonë e pabanuar, pasi në javët e para të luftës Izraeli kishte urdhëruar të gjithë popullsinë të zhvendosej në jug. Deri në 30.000 persona vlerësohet se vazhdojnë të qëndrojnë në veri të Gazës. “Jemi në një fazë të re të luftës”, tha ushtria izraelite në fletëpalosjet e lëshuara nga ajri mbi këtë zonë. “Këto zona tani konsiderohen zona të rrezikshme luftimi”, thuhej më tej.