Dhjetra njerëz janë vrarë dhe plagosur në një sulm izraelit mbi një shtëpi në Jabalia në Gazën veriore, thonë mjekët dhe skuadrat palestineze të shpëtimit. Agjencia zyrtare palestineze e lajmeve Ëafa dhe agjencia e mbrojtjes civile e Hamasit, në Gaza, thanë se të paktën 30 persona ishin vrarë. Mbrojtja civile tha se mes të vdekurve ishin 13 fëmijë. Forcat e Mbrojtjes të Izraelit thanë se goditën një shënjestër në Jabalia ku "terroristët po vepronin", dhe se ishin ndërmarrë hapa për të zbutur pasojat tek civilët...ndërkohë detajet ishin në shqyrtim. Dëshmitarët okularë e përshkruan sulmin izraelit mbi ndërtesën që i përkiste një familjeje, si një "tërmet". "Ne thjesht ishim ulur të qetë. Ata janë qytetarë të pafajshëm që nuk i përkasin asnjë organizate apo fraksioni ushtarak," tha për Reuters një dëshmitar okular dhe i afërm i viktimave. Shtëpia "u bombardua pa paralajmërim, gjë që çoi në vdekjen e të gjithë atyre që ishin brenda”, shtoi ai. Videot dhe imazhet tregonin trupa të shumtë të mbështjellë me batanije në pjesën e pasme të makinave apo të shtrirë në tokë, në një spital. Grupet e ndihmës thonë se Jabalia dhe pjesë të tjera të Gazës veriore kanë qenë të rrethuara që nga fillimi i tetorit, kur Izraeli nisi një ofensivë të re tokësore kundër Hamasit. Izraeli ndërkohë po përballet me një ultimatum të SHBA-së që skadon brenda disa ditësh për të përmirësuar situatën humanitare në Gaza ose për t'u përballur me kufizime të mundshme në bashkëpunimin ushtarak.