Ushtria izraelite ka njoftuar se ka vrarë pesë militantë të tjerë palestinezë në Bregun Perëndimor të pushtuar, përfshirë një komandant lokal. Sipas Izraelit, bastisjet në veri të Bregut Perëndimor, ku gjithsej janë vrarë 16 persona, kanë për qëllim parandalimin e sulmeve. Për palestinezët, ky është një zgjerim i luftës më shumë se 10 mujore mes Izraelit dhe Hamasit në Rripin e Gazës dhe se Izraeli kërkon të përjetësoje sundimin ushtarak mbi Bregun Perëndimor. Sakaq, OBSH ka njoftuar se Izraeli tha se ka rënë dakord për të paktën tre ditë "pauzë humanitare" të luftimeve në Gazë, duke filluar nga e diela, për të lejuar zyrtarët e shëndetësisë të Kombeve të Bashkuara të kryejnë vaksinimin e qindra mijëra fëmijëve kundër poliomielitit në territor. Ndërsa Hamasi ka mirëpritur pauzën humanitare për programin e vaksinave, OBSH është shprehur se për ta parandaluar përhapjen e poliomielitit duhet të vaksinohen 90 për qind e fëmijëve në Gazë. SHBA, Egjipti dhe Katari prej kohësh po kërkojnë arritjen e një marrëveshjeje për armëpushim të luftimeve, ndërsa Bisedimet vazhdojnë edhe këtë javë.