Pas muajsh paralajmërimesh, një raport i fundit i mbështetur nga OKB-ja ofroi prova të forta statistikore se katastrofa humanitare në Gaza po kthehet në një zi buke të shkaktuar nga njeriu. OKB ka rritur presionin ndaj Izraelit për të përmbushur përgjegjësitë e tij ligjore për të mbrojtur civilët palestinezë dhe për të lejuar furnizimet e duhura të ndihmës humanitare për të arritur njerëzit që kanë nevojë për të. Zyrtari më i lartë i OKB-së për të drejtat e njeriut, Volker Turk, tha në një intervistë për BBC se Izraeli mbante një faj të madh dhe se kishte një rast të besueshëm që Izraeli po përdorte urinë si një armë lufte në Gaza. Ai citoi rastin e një autokolone të OKB-së që ndodhet në Egjipt, por që u pengua të hyjë në Gaza. Turk, i cili është komisioneri i lartë i OKB-së për të drejtat e njeriut, tha se nëse vërtetohet qëllimi, kjo do të përbënte një krim lufte. Ministri i Ekonomisë i Izraelit, Nir Barkat, një politikan i lartë në partinë Likud të Benjamin Netanyahut, i hodhi poshtë paralajmërimet e OKB, duke i konsideruar si "të pakuptimta dhe të papërgjegjshme”. Ashtu si kolegët e tij të kabinetit, Barkat këmbënguli se Izraeli po lejonte të gjithë ndihmën e ofruar nga SHBA dhe pjesa tjetër e botës. Izraeli thotë se një pjesë e ndihmave nuk përfundojnë te civilët, por mbahen të bllokuara nga Hamasi.