Pavarësisht paralajmërimeve të Iranit për sulme masive pas vrasjes së liderit të Hamasit Ismail Haniya në territorin e tyre, duket se Izraeli nuk do të ndalet. Herzi Halevi, shefi i shtabit të përgjithshëm të forcave të armatosura izraelite, paralajmëroi se ushtria do ta “gjejë” edhe liderin e ri të Hamasit, Yahya Shinwar, dhe do ta “shkatërrojë” atë. “Ne do të shumëfishojmë përpjekjet për ta gjetur atë, për ta sulmuar dhe që udhëheqja e Hamasit të zëvendësojë edhe një herë kreun e Byrosë Politike,” tha gjenerali Halevi. Shinwar, kreu i Hamasit në Gaza për shtatë vjet, u emërua udhëheqësi politik i grupit të martën mbrëma, duke pasuar Ismail Haniya, i cili u vra javën e kaluar në Teheran në një sulm që i atribuohet Izraelit. Halevi është shprehur se pavarësisht ndryshimit të titllut të Shinwar, kjo nuk do ta ndalojë Izraelin ta shkatërrojë atë. “Ky titull i ri nuk do të ndryshojë asgjë për faktin se ai është një vrasës, përgjegjës për planifikimin dhe ekzekutimin e asaj që ndodhi më 7 tetor dhe kështu ky ndryshim titulli jo vetëm që nuk na pengon ta kërkojmë, por edhe na inkurajon” tha ai. Edhe ministri i Jashtëm i Izraelit, Israel Katz, kishte thënë që nga e marta mbrëma se Sinwar duhet të “shfaroset shpejt”.