Izraeli paralajmëroi Iranin për pasoja nëse do të përshkallëzojë më tej situatën. Zëdhënësi i ushtrisë izraelite, Daniel Hagari tha të shtunën se "Irani do të vuajë pasojat nëse do të marrë hapa të gabuar. “Izraeli është në gatishmëri të lartë. Ne kemi rritur gatishmërinë për të mbrojtur Izraelin nga agresioni i mëtejshëm iranian. Ne jemi gjithashtu të përgatitur të përgjigjemi”, tha ai përmes një deklaratë të shpërndarë prë mediat. Prej disa ditësh Izraeli është në gatishmëri të lartë për një sulm të mundshëm Iranian. Tensionet mes dy vendeve janë shtuar pas sulmit të ndodhur në Damask javën e kaluar ku u vranë dy gjeneralë iranian. Teherani fajësoi Izraelin për ngjarjen ndërsa u zotua për hakmarrje. Ndërkohë Tel Avivi nuk dha asnjë koment mbi sulmin. Udhëheqësit izraelitë kanë kërcënuar se do të godasin drejtpërdrejt Iranin nëse ai sulmon, dhe presidenti amerikan Joe Biden ka deklaruar se angazhimi i SHBA-së ndaj sigurisë së Izraelit është i palëkundur.