Shefi ushtarak i Izraelit u zotua të martën se do ta godasë Iranin "shumë fort" nëse ai hakmerret kundër Izraelit për sulmet e tij në republikën islamike gjatë fundjavës. “Nëse Irani bën gabim duke lëshuar një tjetër breshëri raketash në Izrael, ne do të dimë edhe një herë se si të arrijmë Iranin… dhe të godasim shumë, shumë fort”, tha gjeneral-lejtnant Herzi Halevi. Duke iu drejtuar personelit ushtarak që mori pjesë në sulmin e fundjavës, Halevi tha se disa objektiva ishin lënë mënjanë "sepse mund të na kërkohet ta bëjmë këtë përsëri". "Kjo ngjarje nuk ka përfunduar; ne jemi ende në mes të saj," tha ai, sipas një deklarate të lëshuar nga ushtria. Të shtunën, avionët luftarakë izraelitë kryen sulme ajrore para agimit kundër objektivave ushtarake iraniane dhe objekteve të prodhimit të raketave në hakmarrje për një sulm të madh me raketa balistike nga Teherani në fillim të këtij muaji. Irani konfirmoi se sulmi izraelit kishte shënjestruar objekte ushtarake në kryeqytetin Teheran dhe pjesë të tjera të vendit, por tha se kishte shkaktuar "dëm të kufizuar".