Izraeli ka pranuar të rinisë bisedimet për një armëpushim në Gazë me kërkesë të ndërmjetësve nga Shtetet e Bashkuara, Katari dhe Egjipti. Sipas zyrës së kryeministrit izraelit, Benjamin Netanjahu, këto bisedime do të rifillojnë më 15 gusht. Lajmi vjen ndërkohë që tensionet në rajon janë rritur shumë dhe pritet nga momenti në moment një sulm hakmarrës i iranit dhe aleatëve të tij, mbi izrael. Pas një pauze njëjavore në nëntor të vitit të kaluar, ndërmjetësit nga SHBA-ja, Katari dhe Egjipti janë përpjekur që të arrihet edhe një marrëveshje armëpushimi për luftën që nisi më 7 tetor pasi Hamasi sulmoi Izraelin. Përmes një deklarate të përbashkët, SHBA-ja, Katari dhe Egjipti ftuan palët e përfshira në konflikt që të rinisin bisedimet më 15 gusht në Doha apo Kajro “me qëllim që të tejkalohen ndasitë dhe marrëveshja të nisë së zbatuari pa vonesa”. Një marrëveshje-kornizë “tani është në tryezë dhe vetëm detajet e zbatimit” kanë mbetur pa u zgjidhur dhe ndërmjetësit janë “të përgatitur të paraqesin një propozim final” për të zgjidhur çështjet e mbetura, thuhej në deklaratë. Pas kësaj deklarate, zyra e Netanyahut njoftoi se Izraeli do të dërgojë një ekip negociator më 15 gusht “për të përfunduar punën e nisur lidhur me detajet e marrëveshjes për zbatim”.