Sulmet izraelite në të gjithë Gazën vranë të paktën 59 njerëz, përfshirë gra dhe fëmijë, thanë zyrtarë spitalorë të mërkurën. Izraeli po përgatitet të zgjerojë fushatën kundër Hamasit në një luftë shkatërruese që po hyn në muajin e 20-të. Gjatë sulmeve është goditur edhe një shkollë që strehonte qindra palestinezë të zhvendosur, ku u vranë 27 persona të martën mbrëma, sipas zyrtarëve të spitalit Al-Aksa, përfshirë nëntë gra dhe tre fëmijë. Kjo ishte hera e pestë që shkolla në Gazën qendrore është goditur që nga fillimi i luftës. Një sulm në orët e para të mëngjesit të së mërkurës, ndaj një shkolle tjetër të kthyer në qendër strehimi në qytetin e Gazës, vrau 16 persona, sipas zyrtarëve të spitalit Al-Ahli, ndërsa sulme të tjera në zona të ndryshme vranë të paktën edhe 16 njerëz të tjerë. Shkolla e kthyer në qendër pritjeje në Bureij, një kamp refugjatësh i tejmbushur, shpërtheu në flakë. Ekipet e emergjencave dhe të shpëtimit nxituan të nxirrnin njerëzit nga zjarri. Ushtria izraelite ende nuk ka komentuar sulmet. Izraeli fajëson Hamasin për numrin e viktimave, duke thënë se operon nga infrastrukturë civile, përfshirë shkolla. Hamasi e mohon këtë akuzë. Në fillim të javës, Izraeli miratoi një plan për të pushtuar të gjithë Rripin e Gazës dhe për të qëndruar në territorin palestinez për një kohë të papërcaktuar.