Një sulm ajror izraelit ndaj një kompleksi ku qëndrojnë gazetarët në juglindje të Libanit ka vrarë tre punonjës të mediave, raportoi Agjencia Kombëtare e Lajmeve, media shtetërore e Libanit. Stacioni lokal i lajmeve, Al Jadeed, ka publikuar pamje nga vendi i ngjarjes, që tregonin ndërtesa të shkatërruara dhe makina ku shkruhej PRESS, të mbuluara nga rrënojat. Ushtria izraelite nuk kishte lëshuar një paralajmërim para këtij sulmi. Televizioni pan-arab me bazë në Bejrut, Al-Mayadeen TV, tha se dy punonjës të tij – kameramani Ghassan Najar dhe tekniku i transmetimit Mohammed Rida – ishin në mesin e gazetarëve të vrarë mëngjesin e 25 tetorit. Televizoni Al-Manar i Hezbollahut – grup militant dhe parti politike që kontrollon shumicën e jugut të Libanit – tha se kameramani Ëissam Qassim u vra po ashtu gjatë sulmit ajror në rajonin Hasbaja. Ali Shoeib, korrespondent i njohur i Al-Manarit, që raporton nga jugu i Libanit, u pa në një video duke incizuar veten me telefon dhe duke thënë se kameramani me të cilin kishte punuar për muaj të tërë ishte vrarë. Shoeib tha se ushtria izraelite e dinte e zona që u godit kishte disa shtëpi ku gjendeshin gazetarë të organizatave të ndryshme mediale. Disa gazetarë janë vrarë që kur Hezbollahu dhe Izraeli nisën këmbimin e zjarrit në tetorin e vitit të kaluar, pas nisjes së luftës në Gazë. Nëntorin e vitit të kaluar, dy gazetarë të televizionit Al-Mayadeen u vranë gjatë një sulmi me dronë. Një muaj më vonë, nga granatimi i Izraelit në jug të Libanit u vra videografi i Reutersit, Issam Abdallah, dhe u pagosën gazetarë të tjerë nga Agence France-Presse dhe televizioni Al-Jazeera.