Pavarësisht thirrjeve për armëpushim dhe dhënie fund luftës në rripin e Gazës, ushtria izraelite ka nisur një tjetër offensive. Lajmi është dhënë nga vetë ushtria, e cila ka bërë të ditur se qëllimi fillestar i Operacionit Gideon’s Chariots është të fitojë kontrollin mbi disa zona të Rripit të Gazës. Për këtë qëllim, ushtria kapi pika të rëndësishme strategjike gjatë ditës, “duke kryer sulme të gjera dhe duke mobilizuar trupa”, u tha. Operacioni ushtarak që po zhvillohet tani është hapja e fazës për “arritjen e qëllimeve të luftës” – duke përfshirë lirimin e pengjeve dhe shkatërrimin përfundimtar të organizatës terroriste Hamas, u tha më tej. Sipas raporteve të mediave izraelite, sulmet synojnë gjithashtu të sigurojnë hyrjen e trupave të tjera ushtarake. Pavarësisht përpjekjeve ndërkombëtare, dhe lirimit të disa pengjeve në këmbim të të burgosurve palestinezë, mes palëve nuk është gjetur ende rruga e paqes.