Trupat izraelite e kanë ndarë Rripin e Gazës në dy pjesë dhe kanë vazhduar bombardimet e pareshtura edhe të dielën ënë mbrëmje, tha zëdhënësi i Forcave Mbrojtëse të Izraelit, Daniel Hagari. Ai tha se trupat izraelite arritën në vijën bregdetare duke e ndarë enklavën në “Gazën veriore dhe në Gazën jugore”. Qyteti i Gazës, më i madhi në këtë territor, është tani plotësisht i rrethuar, shtoi ai. “Ne do të vazhdojmë të mbajmë hapur një korridor në mënyrë që banorët e Gazës veriore dhe Qytetit të Gazës të zhvendosen drejt jugut. Ky është një korridor njëdrejtimësh drejt jugut”, theksoi ai. Ndërkohë, ka raportime se shërbimet telefonike dhe të internetit janë ndërprerë përsëri në Gaza. Kryqi i Kuq Palestinez tha se “kjo është hera e tretë” që ndërpriten këto shërbime në Gaza që prej fillimit të luftës dhe si pasojë ai ka humbur kontaktin me ekipet e veta. Administrata e presidentit amerikan, Joe Biden, ka shtuar përpjekjet diplomatike në Lindjen e Mesme për sigurimin e një pauze humanitare në luftën mes Izraelit dhe Hamasit. Drejtori i CIA-s, Ëilliam Burns, ish-ambasador amerikan në Jordani, ndodhet ndërkohë në Izrael për të biseduar me zyrtarët vendas. Ai ka bërë thirrje për shkëmbime më të mëdha në fushën e inteligjencës dhe përpjekje më të mëdha për shmangien e viktimave civile. Sekretari i Shtetit, Antony Blinken, do të ketë bisedime në Turqi, ndalesa e tij më e fundit gjatë turneut rajonal. Shtëpia e Bardhë ka thënë se zëvendëspresidentja Kamala Harris do të bisedojë për konfliktin me liderë të huaj të hënën.