Ushtria izraelite tha të premten se ka vrarë të paktën shtatë militantë në dy përplasje të ndara në Bregun Perëndimor, pasi Hamasi pranoi se një numër i luftëtarëve të tij u vranë në mes të dhunës në rritje. Që prej sulmeve të 7 tetorit, në pjesën jugore të Izraelit, ka pasur rritje dramatike të numrit të përleshjeve në Bregun Perëndimor, ku ushtria izraelite ka shtuar ndërhyrjet duke vendosur në shënjestër grupet militante. Forcat izraelite kryen një operacion gjatë natës në një kamp refugjatësh në Xhenin, qytet në veri të Bregut Perëndimor, i konsideruar prej kohësh qendër e aktivitetit luftarak. "Në total, të paktën pesë terroristë u vranë," tha ushtria përmes deklaratës. Diku tjetër, në jug të Bregut Perëndimor, ministria palestineze e Shëndetësisë tha se dy persona u vranë nga plumbat e ushtrisë izraelite në hyrje të qytetit të Hebronit. Ushtria izraelite tha se "dy sulmues mbërritën me një automjet në një kryqëzim ngjitur me Hebronin dhe qëlluan mbi ushtarët që po vepronin në zonë." "Ushtarët u përgjigjën me zjarr dhe vranë sulmuesit", u tha në një deklaratë ku edhe shtohej se nuk kishte viktima izraelite.