Kombet e Bashkuara thanë se tanket izraelite kishin shpërthyer portat e një baze të forcës së saj paqeruajtëse në Libanin jugor, akuza më e fundit kjo për shkeljet dhe sulmet izraelite të denoncuara prej saj. Forca paqeruajtëse UNIFIL tha se dy tanke izraelite Merkava shkatërruan portën kryesore të një baze dhe hynë me forcë para agimit të së dielës në mëngjes. Pasi tanket u larguan, predhat shpërthyen 100 metra larg, duke lëshuar tym që mbuloi bazën dhe lëndoi personelin e OKB-së, thuhet në një deklaratë. Në versionin e saj të ngjarjeve, ushtria izraelite tha se militantët e grupit Hezbollah të mbështetur nga Irani kishin qëlluar me raketa antitank ndaj trupave izraelite, duke plagosur 25 prej tyre. Sulmi ishte shumë afër një baze të UNIFIL-it dhe një tank që ndihmonte në evakuimin e viktimave u vu nën zjarr dhe hyri në bazën e paqeruajtësve. "Nuk po sulmonim një bazë. Nuk po përpiqeshim të hynim në bazë. Ishte një tank nën zjarr të fortë, në një sulm që shkaktoi viktima, që po përpiqej të largohej nga rreziku", u tha gazetarëve një zëdhënës i ushtrisë. Në një deklaratë, ushtria tha se përdori një mjet tymues për të siguruar mbulim për evakuimin e ushtarëve të plagosur, por veprimet e saj nuk përbënin rrezik për forcën paqeruajtëse të OKB-së. Kryeministri izraelit Benjamin Netanyahu tha ndërkohë në një deklaratë drejtuar Sekretarit të Përgjithshëm të OKB-së Antonio Guterres se kishte ardhur koha që ai të tërhiqte UNIFIL-in nga bastionet e Hezbollahut dhe nga zonat e luftimit". Vetë Guterres ndërkohë ka paralajmëruar që paqeruajtësit të mos vendosen në shënjestër.