Izraeli kreu një sulm ajror të mërkurën mbi selinë komunale në Nabatieh, një qytet i madh në Libanin jugor, duke vrarë kryebashkiakun dhe të paktën pesë persona të tjerë. Sulmi ngriti frikën se fushata ajrore në zgjerim e Izraelit, e projektuar për të shtypur Hezbollahun e mbështetur nga Irani, mund të përfshijë gjithnjë e më shumë zyrtarë publikë dhe ndërtesa, të cilat deri më tani janë kursyer. Kryeministri i përkohshëm i Libanit Najib Mikati dënoi sulmin në kryeqytetin e provincës, duke thënë se ai "qëllimisht kishte patur në shënjestër një takim të këshillit bashkiak ku po diskutohej gjendja në qytet dhe ndihma emergjente". Kjo ishte goditja më e rëndë e Izraelit deri më tani mbi një ndërtesë shtetërore libaneze që kur nisi ofensiva dhe erdhi pavarësisht shqetësimeve të SHBA-së për rritjen e numrit të viktimave dhe frikës për luftë të gjithanshme në rajon. Ministria e shëndetësisë tha se gjashtë persona ishin vrarë, ndërsa ministri i brendshëm konfirmoi vdekjen e kryebashkiakut. Pasi Izraeli lëshoi një njoftim për evakuim në Nabatieh, një qytet me dhjetëra e mijëra banorë, më 3 tetor, një gazetar i Reuters i telefonoi kryebashkiakut Ahmed Kahil për ta pyetur nëse ai do të largohej. Ai tha se nuk do ta bënte këtë. Ushtria izraelite tha të mërkurën se goditi dhjetëra objektiva të Hezbollahut në zonën e Nabatieh-ut dhe çmontoi infrastrukturën nëntokësore, ndërsa marina, goditi gjithashtu dhjetëra objektiva në Libanin jugor, në bashkëpunim me trupat në terren.