Pas sulmeve në veri, Izraeli po përgatitet të ndërmarrë një ofensivë ushtarake në jug të Gazës. Ushtria izraelite paralajmëroi banorët e kësaj zone të Rripit të Gazës që të evakuohen pasi Hamasi ka gjuajtur raketa nga kjo zonë. “Organizatat terroriste edhe një herë kanë gjuajtur raketa drejt shtetit të Izraelit nga zona juaj”, tha zëdhënësi i ushtrisë izraelite në platformën X, duke iu adresuar banorëve të zonës së Han Junisit. “Për sigurinë tuaj, ju duhet të evakuoheni menjëherë nga zona dhe të zhvendoseni në zonën humanitare”, tha ai, duke publikuar hartën e zonës nga ku banorët janë urdhëruar që të mos qëndrojnë aty për shkak të rerzikut që u kanoset. Ushtria izraelite tha këtë të hënë përmes një deklarate se “një predhë kaloi në territorin izraelit nga Han Junisi dhe raketa u rrëzua” nga forcat izraelite. Më pas, Hamasi e mori përgjegjësinë për këtë sulm, duke thënë se ka gjuajtur raketa drejt jugut të Izraelit.