Zyrtarët izraelitë kanë deklaruar se nuk kanë asnjë lidhje me rrëzimin e helikopterit që i mori jetën presidentin iranian Ebrahim Raisi. Raisi, 63 vjeç, u konfirmua i vdekur nga mediat iraniane, bashkë me ministrin e Jashtëm Hossein Amir Abdollahian dhe disa persona të tjerë. Dy pilotë dhe tre zyrtarë të tjerë iranianë e roje sigurie, vdiqën gjithashtu në aksidentin e ndodhur në zonën malore në veriperëndim të vendit. Pamjet me dron nga agjencitë e lajmeve iraniane dhe ato turke zbuluan se helikopteri ishte copëtuar tërësisht, ndërsa videot e shpërndara nga Gjysmëhëna e Kuqe iraniane tregonin skuadrat e shpëtimit që mbanin trupat e pajetë mbi barrela. Incidenti ndezi një valë spekulimesh për shkakun e rrëzimit me shumë teoricienë që drejtuan gishtin nga Izraeli. Vendi është në luftë me Hamasin e mbështetur nga Teherani në Gaza dhe tensionet u vluan në prill kur Izraeli dhe Irani shkëmbyen sulmet e para direkte mes tyre, me dronë dhe raketa. Megjithëse Izraeli nuk ka lëshuar një deklaratë zyrtare, zyrtarët që folën në kushte anonimiteti, hodhën poshtë akuzat që Tel Aviv qëndron pas aksidentit, duke thënë: 'Nuk ishim ne'. Irani nuk ka dhënë ende ndonjë detaj rreth rrëzimit, as nuk ka ofruar një shpjegim përveç një deklarate të thjeshtë mbi kushtet e këqija të motit. Por mjetet ajrore iraniane, veçanërisht modelet e furnizuara nga perëndimi, si helikopteri Bell 212 i prodhuar nga SHBA-ja që mbante Raisi, janë jashtëzakonisht të pasigurt dhe në gjendje të rëndiar pasi Republika Islamike ka qenë prej kohësh subjekt i sanksioneve perëndimore që pengojnë aksesin në pjesët rezervë të nevojshme për mirëmbajtjen e tyre. Nuk dihet se kur është prodhuar helikopteri i Raisi, por Bell 212 ka qenë në përdorim nga qeveritë në mbarë botën për më shumë se 50 vjet, duke hyrë për herë të parë në shërbim në fillim të viteve '70.