Edhe pse një marrëveshje armëpushimi është në fuqi, forcat izraelite nuk po e kursejnë Libanin, me të cilin filluan sulme për shkak se grupet e Hezbollahut po bashkëpunonin me Hamasin. Mediet ndërkombëtare bëjnë të ditur se të paktën 11 persona kanë humbur jetën dhe 80 të tjerë kanë mbetur të plagosur, si pasojë e të shtënave me armë nga ushtria izraelite në jug të Libanit. Të njëjtat burime bëjnë me dije se ushtria ka hapur zjarr ndaj disa protestuesve, të cilët ishin mbledhur për të kërkuar largimin e trupave izraelite, pas marrëveshjes për armëpushim. Zyrtarët libanezë thanë se mes viktimave ishin dy gra dhe një ushtar libanez. Protestuesit, disa prej të cilëve mbanin flamuj të grupit Hezbollah, u përpoqën të hynin në një sërë fshatrash në shenjë kundërshtie ndaj mostërheqjes së Izraelit nga jugu i Libanit, në përfundim të afatit 60 ditor që u ra dakord në marrëveshjen e armëpushimit që i dha fund luftës mes Izraelit dhe Hezbollahut në fund të nëntorit.