Të mërkurën, forcat tokësore izraelite në Rripin e Gazës filluan operacionet për gjetjen dhe eliminimin e rrjetit të gjerë të tuneleve të përdorura nga militatët e Hamasit që kontrollon enklavën. Kjo përbën fazën e radhës së ofensivës izraelite, ndërsa njoftohet për mijëra të vrarë palestinezë. Izraeli ka nisur operacionet ushtarake nga ajri dhe toka që nga 7 tetori dhe ka ndarë tani gazën në dy pjesë. Qyteti i Gazës, më i madhi i territorit dhe bastioni kryesor i Hamasit, është i rrethuar. Izraeli thotë se trupat e tij kanë përparuar në zemër të qytetit ndërsa Hamasi njofton se luftëtarët e tij kanë shkaktuar humbje të mëdha ndaj forcave izraelite. Zëdhënësi i ushtrisë izraelite, Daniel Hagari, tha se trupat xheniere po përdorin mjete shpërthyese për të shkatërruar një rrjet tunelesh të ndërtuara nga Hamasi, që shtrihen disa qindra kilometra nën Gaza. Ministri i Mbrojtjes, Yoav Gallant, tha se Izraeli kishte “objektiv, terroristët e Hamasit në Gaza, infrastrukturën e tyre, komandantët, bunkerët dhe dhomat e komunikimit”. Sipas izraelit ndërkohë, sulmet ajrore në gaza kanë vrarë edhe një prodhues kryesor të armëve të hamasit dhe disa luftëtarë të tjerë. Sipas ushtrisë izraelite, dy sulme të ndara eleminuan një Mahsein Abu Zina një prodhues armësh të hamasit dhe disa luftëtarë të hamasit u angazhuan në përleshje në tokë me forcat izraelite. Burime nga hamasi dhe Xhihadi islamik në anën tjetër, thanë se tanket izraelite janë përballur me rezistencë të fortë nga luftëtarët e Hamasit që përdorin rrjetet e tuneleve për të sulmuar. “E sfidoj Izraelin...nëse ka qenë në gjendje, deri në këtë moment, të citojë ndonjë arritje ushtarake në terren përveç vrasjes së civilëve”, tha për televizionin Al Jazeera një zyrtar i lartë i Hamasit, Ghazi Hamad. “Gaza është e pathyeshme dhe do të mbetet një gjemb në fyt për amerikanët dhe zionistët”, tha zyrtari i Hamasit.