Ministri i Jashtëm izraelit Gideon Saar akuzoi të enjten zyrtarë evropianë të paidentifikuar për "nxitje toksike antisemite", të cilën ai e fajësoi për një klimë armiqësore në të cilën ndodhën edhe të shtënat ku humbën jetën dy punonjës të ambasadës izraelite në Uashington. Izraeli është përballur me një stuhi kritikash nga Evropa kohët e fundit, ndërsa ka intensifikuar fushatën e tij ushtarake në Gaza, ku grupet humanitare kanë paralajmëruar se një bllokadë 11-javore izraelite ndaj furnizimeve me ndihma e ka lënë enklavën palestineze në prag të urisë. Saar nuk përmendi asnjë vend ose zyrtar, por tha se klima e armiqësisë ndaj Izraelit qëndron pas të shtënave që i morën jetën punonjësve të ambasadës Yaron Lischinsky dhe Sarah Lynn Milgrim, jashtë një muzeu hebre në Uashington të mërkurën. Saar, në një konferencë për shtyp në Jerusalem, tha se sulmi ishte një rezultat i drejtpërdrejtë i "nxitjeve toksike antisemite kundër Izraelit dhe hebrenjve në të gjithë botën" që nga sulmi ndërkufitar i militantëve të Hamasit ndaj Izraelit në tetor 2023. "Ekziston një linjë e drejtpërdrejtë që lidh nxitjen antisemite dhe anti-Izrael me këtë vrasje", tha ai. "Kjo nxitje bëhet edhe nga udhëheqës dhe zyrtarë të shumë vendeve dhe organizatave, veçanërisht nga Evropa."