Media shtetërore e Libanit raportoi për vazhdim të sulmeve izraelite në jug të vendit, por këto raportime nuk kanë mundur të verifikohen në mënyrë të pavarur. Ushtria libaneze, në orët e para të së premtes pretendoi për disa “shkelje të armëpushimit” nga ana e Izraelit dhe u bëri thirrje qytetarëve të mos kthehen menjëherë në fshatrat jugore. Për arritjen e armëpushimit njoftoi një ditë më parë presidenti amerikan, Donald Trump, dhe më pas arritja e tij u konfirmua edhe nga udhëheqësit izraelitë dhe libanezë. Trump njoftoi për armëpushimin pasi bisedoi me kryeministrin izraelit, Benjamin Netanyahu, dhe presidentin libanez, Joseph Aoun. Presidenti amerikan tha se planifikon t’i takojë të dy udhëheqësit brenda një ose dy jave. Përmes një video-deklarate, Netanyahu tha se ishte pajtuar për një armëpushim 10-ditor dhe se ekziston mundësia për të arritur një marrëveshje historike me Libanin pas dekadash konflikt. Presidenti amerikan tha se armëpushimi përfshin edhe Hezbollahun, grup militant dhe parti politike që kontrollon pjesë të mëdha të jugut të Libanit. Në një postim në rrjetet sociale pasi armëpushimi hyri në fuqi, Trump shkroi: “Shpresoj që Hezbollahu të sillet mirë gjatë kësaj periudhe të rëndësishme. Do të ishte një moment I MADH për ta nëse e bëjnë këtë. Jo më vrasje. Duhet më në fund të ketë PAQE!”. Libani ka këmbëngulur që të arrihet një armëpushim para se të zhvillojë bisedime të mëtejme, por ka premtuar se do të çarmatosë militantët e Hezbollahut. Disa pamje të publikuara nga AFP tregonin njerëz duke u kthyer në bastionin e Hezbollahut dhe disa prej tyre valëvitnin flamurin e verdhë të grupit, që mbështetet nga Irani, ndërsa të tjerë mbanin fotografinë e udhëheqësit të vrarë të Hezbollahut, Hassan Nasrallah. Paraprakisht, Hezbollahu u kishte bërë thirrje banorëve që të mos kthehen në zonën në jug të Libanit, para se të jetë e qartë se armëpushimi po respektohet. Ky grup po ashtu u ka kërkuar njerëzve që të mos festojnë me armë.