Kryeministri izraelit Benjamin Netanyahu tha se një ofensivë e zgjeruar kundër grupit militant palestinez Hamas do të jetë "intensive" pasi kabineti i tij i sigurisë miratoi plane që mund të përfshijnë pushtimin e Rripit të Gazës dhe kontrollin e ndihmës. Megjithatë, një zyrtar i mbrojtjes izraelite tha se operacioni nuk do të nisë para se Presidenti i SHBA-së Donald Trump të përfundojë vizitën e tij në lindjen e mesme, javën e ardhshme. Vendimi, pas javësh përpjekje për të rënë dakord për një armëpushim me Hamasin, nënvizon kërcënimin se lufta mund të vazhdojë pa asnjë fund në horizont. Një raport nga transmetuesi publik i Izraelit Kan tha se plani i ri ishte gradual dhe do të zgjaste me muaj. Netanyahu tha në një mesazh video se operacioni do të ishte "intensiv" dhe do të shihte më shumë palestinezë në Gaza të zhvendoseshin "për sigurinë e tyre". Ai tha se trupat izraelite nuk do të ndiqnin taktikat e mëparshme të bazuara në bastisje të shkurtra nga forcat e bazuara jashtë Gazës. "Qëllimi është i kundërt", tha ai, duke i bërë jehonë komenteve nga zyrtarë të tjerë izraelitë të cilët kanë thënë se Izraeli do të mbajë nën kontroll tokën që ka pushtuar. I dërguari amerikan Steve Ëitkoff, tha se Izraeli është një shtet sovran që merr vendimet e veta,por ai shpreson për përparim në një marrëveshje për pengjet dhe armëpushim të mundshëm para ose gjatë vizitës së Trumpit në rajon. Trupat izraelite kanë marrë tashmë nën kontroll një zonë që arrin në rreth një të tretën e Gazës, duke zhvendosur popullsinë dhe duke ndërtuar kulla vrojtimi dhe poste mbikëqyrjeje në tokën e pastruar që ushtria e ka përshkruar si zonë sigurie, por plani i ri do të shkojë më tej.