Ministri izraelit i Mbrojtjes, Izrael Katz, deklaroi se së bashku me kryeministrin Benjamin Netanyahu i kanë dhënë udhëzime ushtrisë izraelite të përgatitet për një luftë të përgjithshme kundër zyrtarëve të lartë dhe strukturave të Autoritetit Palestinez, si dhe kundër infrastrukturës që Izraeli e konsideron terroriste në Bregun Perëndimor. Deklarata erdhi pas një sulmi me thikë pranë fshatit Kusrra, ku një person mbeti i plagosur. Sulmuesi u eliminua nga forcat izraelite. Si kundërpërgjigje, kryeministri Netanyahu tha se asnjë terrorist nuk mund të fshihet dhe paralajmëroi se Izraeli do të vazhdojë të gjurmojë personat që organizojnë sulme dhe të shkatërrojë infrastrukturën e armatosur. Ndërkohë, ushtria izraelite ka nisur disa stërvitje për të testuar gatishmërinë në rast të një sulmi të ngjashëm me atë të 7 tetorit, në disa fronte njëkohësisht. Operacionet po zhvillohen në zona të ndryshme, përfshirë kufirin perëndimor të Izraelit. Situata në Bregun Perëndimor mbetet e tensionuar. Të dielën, trupat izraelite kryen një operacion në veri të Bregut Perëndimor, ku raportuan zbulimin e një rakete, një pushke M16, municioneve dhe sasi të mëdha eksplozivësh që dyshohet se do të përdoreshin për prodhimin e bombave. Operacioni pasoi arrestimin të premten të një celule me pesë persona. Sipas ushtrisë izraelite, grupi kishte armë dhe municione dhe dyshohet se po përgatitej të kryente një sulm të madh në veri të Bregut Perëndimor.