Të paktën tetë palestinezë u vranë gjatë sulmeve ajrore izraelitete ndaj qytetit të Khan Younisit, njoftoi ministria e shëndetësisë e Hamas. Qyteti në jug të Rripit të Gazës u bombardua një ditë pasi Izraeli urdhëroi evakuimin e civilëve palestinezë. Sulmet u përqëndruan kryesisht në zonën nga ku militantët lëshuan 20 raketa drejt qyteteve izraelite. Sulme të tjera ajrore kishin në shënjestër qytetin jugor të Rafahut, ndërsa trupat tokësore izraelite kryen operacione kundër Hamasit në pjesën qendrore të Gazës. Stephane Dujarric, zëdhënësi i Sekretarit të Përgjithshëm të OKB-së, Antonio Guterres, u tha gazetarëve të hënën se urdhri izraelit për evakuim nga Khan Younis tregon "se në Gazë nuk ka më asnjë vend të sigurt dhe se duhen bërë më shumë përpjekje për të mbrojtur civilët". Lufta Izrael-Hamas shpërtheu pas sulmit më 7 tetor të vitit 2023 nga grupi militant ndaj shtetit hebre duke vrarë rreth 1200 persona e marrë peng më shumë se 250 të tjerë. Si pasojë e kundërpërgjigjes izraelite janë vrarë deri tani rreth 38,000 persona raporton zëri i amerikës.