Ushtria e Izraelit njoftoi se ka kryer sulme ajrore kundër rebelëve huthi në Jemen. Po ashtu IDF sqaroi se ka çaktivizuar plotësisht dhe aeroportin ndërkombëtar të vendit në kryeqytetin Sana. Ofensiva erdhi një ditë pas sujlmeve të kruyera në portin e Hudejdës. Tel Avivi iu kundërpërgjigj rebelëve pasi këta të fundit bombarduan aeroportin kryesor të Izraelit. Ushtria izraelite tha se u goditën edhe disa termocentrale. Pamje të transmetuara në televizionin izraelit shfaqën tym të zi dhe dendur që ngrihej mbi qiellin e Sanas. Nuk dihet tani për tani nëse ka viktima. Sulmi ndodhi pak pasi ushtria izraelite paralajmëroi në rrjetet sociale njerëzit të largoheshin nga pjesët përreth aeroportit kryesor të kryeqytetit të Jemenit, Sana. “Ju bëjmë thirrje të largoheni menjëherë nga zona e aeroportit dhe të paralajmëroni këdo që ndodhet aty pranë që të largohet menjëherë”, shkroi zëdhënësi i ushtrisë izraelite,, në rrjetet sociale. Ndërkohë ministri izraelit i Mbrojtjes, Israel Katz, tha se ky sulm duhet të shihet si një paralajmërim për “kokën e oktapodit iranian”, për të cilin ai tha se mban përgjegjësi të drejtpërdrejtë për sulmet e rebelëve Huthi ndaj Izraelit, shkruan Rado Evrpa e Lirë.