Izraeli ka vazhduar bombardimet mbi Gaza natën mes 10 dhe 11 tetorit, duke vrarë të paktën 30 persona. Ushtria e Izraelit tha të mërkurën në mëngjes se avionët e saj luftarakë goditën më shumë se 200 shënjestra në një lagje të Gazës, për të cilat tha se ishin shfrytëzuar nga Hamasi për të nisur sulmet e paprecedentta dhe të befasishme ndaj Izraelit në fundjavë. Një zëdhënës i Hamasit në Gaza tha të mërkurën se të paktën 30 persona u vranë si pasojë e sulmeve ajrore izraelite gjatë natës. Numri i përgjithshëm i të vrarëve në enklavën e mbipopulluar bregdetare është rritur në 950, ndërsa janë plagosur 5.000 persona, tha Ministria e Shëndetësisë e Gazës. Ndërsa ushtria izraelite tha të mërkurën se numri i përgjithshëm i të vrarëve në Izrael ka arritur në 1.200 dhe se më shumë se 2.700 njerëz janë plagosur. “Kemi shumë të vrarë”, tha zëdhënësi i ushtrisë izraelite, koloneli Jonathan Conricus, në rrjetin social X. Shumica e viktimave sipas zyrtarëve, janë civilë, të vrarë me armë në shtëpitë e tyre, në rrugë apo në një festival të hapur. Shumë persona, të huaj dhe izraelitë, u morën peng dhe u dërguan në Gaza nga militantët e Hamasit. Militantët e Hamasit kërcënuan të hënën se do të vrasin pengjet izraelite, civilë dhe ushtarë, nëse Izraeli vazhdon ta bombardojë Gazën pa paralajmërim, por nuk ka ndonjë të dhënë që të tregojë se e kanë bërë një gjë të tillë ndërkohë që ushtria izraelite nuk i ndal sulmet ajrore. Ministri i Mbrojtjes i Izraelit, Yoav Gallant, duke folur me ushtarët e mbledhur afër kufirit me Gazën tha se “Hamasi donte një ndryshim dhe do ta merrte atë. Nuk do të mbetet asgjë nga ajo që sot është në Gaza” – tha ai.