Ushtria izraelite ka marrë kontrollin dhe ka ndaluar stafin në dy prej spitaleve të fundit funksionale në veri të Gazës, ndërsa autoritetet izraelite deklarojnë se ushtria po punon për shfarosjen e Hamasit. Izraeli bombardoi të martën qytezat në jug të Gazës, duke vrarë të paktën 45 palestinezë, ndërsa vazhdon ofensivën, pavarësisht rritjes së presionit ndërkombëtar. Ministri izraelit i Mbrojtjes, Yoav Gallant, paralajmëroi se fushata në jug të Gazës, do të zgjasë me muaj. Sipas tij, forcat izraelite po hyjnë në sistemin e tuneleve në veri të gazës, në kuadër të pastrimit final të rajonit, nga militantët. Në pjesën veriore të Gazës po zhvillohen ndërkohë operacione intensive, dhe për pasojë, autoritetet shëndetësore palestineze kanë thënë se dhjetëra njerëz janë vrarë nga bombardimet. Pas një takimi që pati me zyrtarët izraelitë të hënën, Sekretari amerikan i Mbrojtjes, Lloyd Austin, i bëri thirrje Izraelit që të mbrojë civilët, por përsëriti se SHBA-ja mbështet Izraelin në luftën e tij kundër Hamasit, duke thënë se nuk është aty “për të diskutuar periudha kohore apo kushte”. Deklaratat e tij dhanë një sinjal se SHBA do të vazhdojë të mbrojë Izraelin prej thirrjeve ndërkombëtare për një armëpushim, dhe do të ofrojë ndihmë për një prej fushatave ushtarake më vdekjeprurëse të shekullit 21. Ministria e Shëndetësisë në Gazë ka thënë se mbi 19.600 njerëz janë vrarë si pasojë e sulmeve izraelite në Gazë. Hamasi ka vazhduar të rezistojë ndaj sulmeve, duke nisur raketa në Izrael, por nuk është raportuar për të plagosur atje. Ushtria e Izraelit ka thënë se 131 ushtarë të saj janë vrarë në ofensivën tokësore në Gazë. Izraeli deklaron se ka vrarë rreth 7.000 militantë, pa ofruar dëshmi, dhe fajëson Hamasin se po përdor civilët si mburoja, kur lufton në zonat e banimit.