Sulmet izraelite vranë të paktën 60 persona në të gjithë Gazën të hënën në disa nga sulmet më të rënda në javë të tëra, ndërsa zyrtarët izraelitë pritet të mbërrijnë në Uashington për një nismë të re armëpushimi nga Presidenti amerikan Donald Trump. Një ditë pasi Trump bëri thirrje; "Bëni marrëveshje në Gaza, ktheni pengjet", ministri i çështjeve strategjike të Izraelit, Ron Dermer, një njeri i besueshëm i kryeministrit Benjamin Netanyahu, po udhëton për në Uashington për bisedime mbi Iranin dhe Gazën, sipas një zyrtari izraelit dhe një burimi të njohur me çështjen. Dermer pritet të fillojë takimet me zyrtarët e administratës Trump të martën, tha burimi në Uashington. Por në terren në enklavën palestineze, nuk ka shenja të ndalimit të luftimeve. Ushtria izraelite lëshoi urdhra evakuimi për banorët në lagje të shumta në pjesën veriore të Rripit të Gazës duke shkaktuar një valë të re zhvendosjesh. "Shpërthimet nuk u ndalën; ata bombarduan shkolla dhe shtëpi. Dukeshin si tërmete", tha një 60 vjeçar, baba i pesë fëmijëve, nga Qyteti i Gazës. "Në lajme dëgjojmë se një armëpushim është afër, në terren shohim vdekje dhe dëgjojmë shpërthime”, shtoi ai. Tanket izraelite hynë në zonat lindore të periferisë Zeitoun në qytetin e Gazës dhe bombarduan disa zona në veri, ndërsa avionët bombarduan të paktën katër shkolla pasi urdhëruan qindra familje që strehoheshin brenda tyre të largoheshin, thanë banorët. Të paktën 58 persona u vranë në sulmet izraelite të hënën, thanë autoritetet shëndetësore, përfshirë 10 të vrarë në Zeitoun dhe të paktën 13 të vrarë në jugperëndim të qytetit të Gazës. Mjekët thanë se shumica ishin goditur nga armë zjarri, por banorët raportuan gjithashtu një sulm ajror. Më herët, 22 persona, përfshirë gra, fëmijë dhe një gazetar vendas, u vranë në një sulm ajror izraelit mbi një kafene buzë detit, në qytetin e gazës.