Një mësuese shkolle në SHBA tha se ajo qëndroi për pesë orë në vetë-izolim vullnetar në tualetin e një avioni pasi kishte rezultuar pozitive me covid në mes të fluturimit. Marisa Fotieo tha se ajo ndjeu dhimbje fyti ndërsa udhëtonte nga Cikago drejt Rekiavikut në Islandë, më 20 dhjetor. Ajo tha se bëri një test të shpejtë që e kishte marrë me vete, i cili i konfirmoi se ishte e infektuar. Pas kësaj, u mbyll në tualet për gjithë pjesën e mbetur të udhëtimit dhe një stjuardesë i conte atje ushqime apo pije. Nuk u bë menjëherë e qartë nëse ajo kishte paraqitur apo jo një test covidi para se të ngjitej në avion. “Ishte një eksperiencë e cmendur”, tha Fotieo për NBC Neës. “Ishin 150 persona në avion dhe frika ime më e madhe ishte se mos i infektoja ata”. Një video të cilën ajo e postoi në tiktok, nga brenda tualetit të avionit, është parë më shumë se katër milionë herë. Ajo falenderoi stjuardesën që e ndihmoi gjatë izolimit të saj. “Stjuardesa u sigurua që unë të kisha gjithcka që më duhej për pesë orët e udhëtimit, nga ushqimi e deri tek pijet, dhe më pyeste vazhdimisht se si ndjehesha”, tregoi gruaja. Në zbritjen në Islandë, Fotieo u izolua në një hotel.