Hetimi i prokurorisë tregon se shkeljet e rënda dhe neglizhenca e mjekëve në rastin tragjik të vdekjes së 3 vjeçarit Brian Spahiu nisën në klinikën private të mjekut Roland Xhaxho, vijuan në pediatrinë e Spitalit të Tiranës dhe u mbyllën me raportin e cunguar dhe të pasaktë mjeko-ligjor për shkakun e vërtetë të vdekjes së të miturit. Ekspertiza italiane për shkaqet e vdekjes së të mitur zbuloi se në klinikën ‘Splendent’ të mjekut Roland Xhaxho dhe vajzës së tij, mjekes, Ina Xhaxho ka pasur pakujdesi dhe papërgjegjshmëri në ndërhyrjen kirurgjikale tek 14 dhëmbë të 3 vjeçarit. Tre ditë pas kësaj ndërhyrje, i mituri shtrohet në gjendje të rëndë në reanimacionin e pediatrisë së QSUT, ku përgjegjës për ndjekjen e rastit të tij ishin mjekët e terapisë intensive me inicialet V.H. dhe D.S. Që të dy mjekët u hetuan në gjendje të lirë me dyshimet e neglizhencës në mjekim, pasi ekspertiza italiane ka konstatuar shkelje të protokolleve mjekësore nga ana e tyre. Shpërdorimi i detyrës vijoi nga dy mjeko-ligjorët, Elton Serani dhe Erindo Allo, ndaj të cilëve gjykata u vendosi më herët masën e pezullimit nga detyra. Mjekët dyshohet për shpërdorim detyre të kryer në bashkëpunim, pasi kanë dorëzuar në gjykatë një raport të cunguar dhe të pasaktë për shkaqet e vërteta të vdekjes së të miturit, Brian Spahiu.