Një raketë e forcave ajrore franceze ka rrëzuar aksidentalisht avionin italian me pasagjerë, mbi mesdhe, në 1980-ën, në një përpjekje të dështuar për të vrarë udhëheqësin e atëhershëm të libisë, Moammar Gadafin. Ky është versioni i ish kryeministrit italian, Giuliano Amato, i cili i bëri thirrje presidentit Emmanuel Macron që ta përgënjeshtrojë ose ta konfirmojë pohimin e tij. Bëhet fjalë për një incident të ndodhur më 27 qershor të vitit 1980, kur një avion që kryente fluturime të brendshme në itali u rrëzua duke marrë jetën e 81 personave në bord. Në një intervistë për të përditshmen italiane 'La Repubblica', Amato tha se është i bindur se avioni ishte goditur nga forcat ajrore franceze ndërsa kishte në shënjestër një avion ushtarak libian. Amato pranoi se nuk kishte prova konkrete për ta mbështetur këtë pretendim, por shtoi gjithashtu se Italia kishte informuar në atë kohë Gadafin dhe sipas tij udhëheqësi libian, i cili po kthehej në Tripoli, nga një takim në ish-Jugosllavi, nuk kishte hipur në avionin ushtarak libian. Aksidenti i vitit 1980 me avionin italian me pasagjerë, vazhdon të mbetet një nga misteret më të mëdha në Italinë e kohëve moderne. Disa thonë se ngjarja ishte pasojë e një bombe që kishte shpërthyer në bordin e avionit që po fluturonte nga Bolonja drejt Siçilisë, ndërsa të tjerë thonë se nga ekzaminimi i mbetjeve të nxjerra nga fundi i detit, disa vite më vonë, rezultoi se avioni ishte goditur nga një raketë. Disa javë pas rrëzimit të avionit italian me pasagjerë, mbetjet e një avioni ushtarak libian MiG, me trupin tejet të dekompozuar të pilotit të tij, u zbuluan në malet e largëta në jug të Kalabrisë.