Italia regjistroi numrin më të madh të turistëve në vitin 2023. Sipas të dhënave të fundit të zyrës shtetërore të statistikave, ISTAT dhe ministrisë së turizmit, vitin e kaluar vendi fqinj u vizitua nga më shumë se 134 milionë turistë. Ndërkohë që pati rreth 451 milionë akomodime. Autoritetet italiane thanë se shifrat e fundit kanë qenë rekorde pasi në krahasim e vitin 2022 pati një rritje me rreth 13.4% më shumë, ose me rreth 16 milionë pushues. Shifrat tejkalojnë dhe ato të vitit 2019, ku pati 131 milionë pushues. Rajonet me më së shumti vizitorë ishin Veneto, zona e Venedikut, Toskana, Lombardia dhe Lazio, pa përjashtuar edhe kryeqytetin, Romën. Por ky fluks i madh ka shkaktuar pakënaqësi tek banorët e këtyre zonave të cilët kërkojnë nga autoritetet që numri i turistëve të kontrollohet ose të kufizohet pasi vështirëson jetesën e tyre, pasi përballen shpesh me bllokime trafiku por dhe situata të tjera.