Raundi i dytë i bisedimeve bërthamore mes Shteteve të Bashkuara dhe Iranit do të mbahet në Romë, tha të hënën ministri i Jashtëm italian Antonio Tajani për agjencianë kryesore të lajmeve në vend, ANSA. Irani dhe SHBA-ja thanë se zhvilluan bisedime "pozitive" dhe "konstruktive" në Oman të shtunën dhe ranë dakord të takoheshin sërish këtë javë. “Kemi marrë një kërkesë nga palët e interesuara dhe nga Omani, i cili po luan rolin e ndërmjetësit dhe kemi dhënë një përgjigje pozitive”, citohet të ketë thënë Tajani. Roma ka pritur shpesh këto lloj bisedimesh, tha ministri i jashtëm italian, dhe është "e përgatitur të bëjë gjithçka që duhet për të mbështetur të gjitha negociatat që mund të çojnë në një zgjidhje të çështjes bërthamore dhe në ndërtimin e paqes". Më herët, agjencia amerikane e lajmeve Axios, duke cituar dy burime të paidentifikuara me njohuri për këtë çështje, raportoi se raundi i dytë i bisedimeve SHBA-Iran do të mbahej në Romë të shtunën. Presidenti i SHBA Donald Trump, i cili ka kërcënuar me veprime ushtarake nëse nuk arrihet marrëveshje për ndalimin e programit bërthamor të Iranit, u tha gazetarëve në bordin e Air Force One të dielën se ai u takua me këshilltarët për Iranin dhe priste një vendim të shpejtë. Ai nuk dha detaje të tjera.