Kryeministrja italiane, Giorgia Meloni, e ndoqi me kujdes Donald Trumpin kur ai ishte president i SHBA-së dhe mund të ishte në vendin e duhur për të shërbyer si një urë lidhëse mes Evropës dhe Uashingtonit nëse ai rifitonte pushtetin në zgjedhjet e muajit të ardhshëm. Megjithatë, marrëdhënia mes dyshes konservatore përballet me një problem: shpenzimet e ulëta të mbrojtjes të Italisë. Gjatë presidencës së tij, Trump këmbënguli që anëtarët e NATO-s të përmbushin një angazhim të hershëm për të shpenzuar 2% të PBB-së së tyre për mbrojtje. Kur ai mori detyrën në vitin 2017, vetëm katër nga 29 vendet e NATO-s e arritën atë objektiv. Këtë vit, pas dy vitesh lufte në kufijtë e saj lindorë në Ukrainë, NATO parashikon që 23 vende nga një klub i zgjeruar prej 32 anëtarësh do ta arrijnë këtë prag, por jo Italia. Qeveria e Melonit muajin e kaluar parashikoi se shpenzimet e mbrojtjes do të arrinin në 1.49% të PBB-së këtë vit, nga 1.5% në vitin 2023 dhe do të bien më tej në 1.44% në 2025 dhe 2026. Zyrtarët thonë se ata synojnë të arrijnë 2% në 2028 dhe argumentojnë se shpenzimet po rriten në terma realë, me një rritje të dukshme në prokurimin e pajisjeve. Por kjo nuk ka gjasa t'i bëjë përshtypje Trumpit. "Unë mendoj se Meloni do të jetë një partnere e natyrshme për Trumpin, dhe se kushdo që vjen në administratën Trump ... do të dojë të bashkëpunojë me Italinë, por kjo e fundit duhet ta kuptojë që duhet të arrijë 2 për qindëshin”, thotë Victoria Coates, një zëvendës këshilltare për sigurinë kombëtare e Trumpit. Meloni ka krijuar lidhje të mira me presidentin Joe Biden dhe ka refuzuar të komentojë zgjedhjet në SHBA. Para se të bëhej kryeministre, ajo mori pjesë në disa tubime politike konservatore ku Trump ishte folës.