Evropa po përgatitet për një valë tjetër të nxehti, ndërsa paralajmërimet për nxehtësi përvëluese u lëshuan në të gjithë Italinë dhe në Kroaci. Kjo vjen vetëm disa ditë pasi temperaturat e larta shkaktuan qindra vdekje në të gjithë kontinentin. Për Evropën Perëndimore, ku kushtet e nxehtësisë janë zbutur disi, nxehtësia ka të ngjarë të rritet përsëri javën e ardhshme. Paralajmërimet e kuqe për të nxehtin janë tani në fuqi në 25 nga 27 qytete në Itali, nga Bolzano në veri deri në Palermo në ishullin e Siçilisë në jug. Paralajmërimi për mot ekstrem ka përfshirë edhe Kroacinë, me alarme që mbulojnë kryeqytetin Zagreb dhe vendet e nxehta turistike Dubrovnik dhe Split. Të hënën, dhjetëra zjarrfikës dhe katër avionë luftuan një zjarr të madh në ishullin turistik Vis, 55 km në jugperëndim të Splitit. Në Serbinë fqinje, temperaturat mund të rriten deri në 39 gradë Celsius, tha të martën Shërbimi Hidrometeorologjik Shtetëror. Ishujt Kanarie janë të përgatitur për mot më intensiv gjatë ditëve në vijim. Temperaturat e larta deri në 40 gradë celcius do të shoqërohen nga erëra të forta. Britania është paralajmëruar gjithashtu për një valë të dytë të të nxehtit që po vjen, me temperaturat që do të arrijnë në 33 gradë Celsius. Edhe pjesë të Portugalisë janë vendosur në alarm të kuq për shkak të temperaturave të larta të parashikuara për ditët në vijim, pasi u kursyen nga vala e fundit e të nxehtit në Evropë. Agjencia e motit IPMA tha se rajonet e Lisbonës dhe Setubalit në bregdet do të jenë në alarm të kuq për temperatura të larta të enjten me temperaturat që do të arrijnë deri në 44 gradë celcius në disa vende. Rekordet e të gjitha kohërave janë thyer në Gjermani, Poloni, Republikën Çeke, Sllovaki dhe Hungari, ndërkohë britania e madhe dhe zvicra ka parë qershorët më të nxehtë në histori.