I gjithë stafi, administrativ, i sigurisë dhe ai logjistik që Italia solli në Shëngjin dhe Gjadër për të menaxhuar qendrat e pritjes së emigrantëve janë larguar sërish në drejtim të Italisë. Si qendra e pritjes dhe përpunimit të kërkesave për azil në Shëngjin, ashtu edhe kampi i Gjadrit këtë të diel janë boshatisur. Kampet bosh i ka gjetur një grup deputetësh të Parlamentit Europian, ndërsa mediat italiane shkruajnë se punonjësit, përfshirë këtu administrata, siguria dhe shërbimet mbështetëse janë tërhequr drejt Italisë. Burime nga Ministria e Brendshme italiane, cituar nga mediat italiane thonë se personeli në Shëngjin dhe Gjadër është reduktuar në varësi të nevojave që ka sot në këto dy qendra, praktikisht zero pasi ende asnjë emigrant nuk ndodhet i strehuar në to. Sipas burimeve, aktualisht janë 7 persona të administratës që janë në kontakte me palën shqiptare në pritje të 4 dhjetorit, kur gjykata e lartë italianë do të shprehet në lidhje me vendimet e gjykatave më të ulta të Romës, që kanë rrëzuar dekretet e Melonit.