Qeveria italiane përmes një dekreti ka shtyrë afatin e vlefshmërisë së lejeve të qëndrimit në Itali. Lajmi bëhet i ditur nga përfaqësitë shqiptare atje sipas të cilave, me dekretin e 14 janari 2021, afati i vlefshmërisë së lejeve të qëndrimit me datë skadence deri më 31 dhjetor 2020 shtyhen deri më 30 prill. Kjo për shkak të situatës së krijuar nga pandemia e COVID-19 dhe masave të marra nga shteti italian në përpjekje për të ulur numrin e infektimeve. “Konsullata e Përgjithshme e Republikës së Shqipërisë në Milano njofton të gjithë shtetasit shqiptarë në Itali, se, në bazë të Dekretit të ri të Qeverisë Conte, 14 janar 2021 n. 2. neni 5, afati i vlefshmërisë së lejeve të qëndrimit (permesso di soggiorno) me datë skadence deri në 31 dhjetor 2020, zgjatet deri në datën 30 prill 2021”, thuhet në njoftimin zyrtar të konsullatës së Milanos dhe i njëjti njoftim bëhet dhe nga konsullata shqiptare në Bari.