U qëllua me tre plumba ne gjoks dhe nuk ka mundur t`i mbijetojë plagëve pavarësisht se u dërgua me urgjencë në spital. 28 vjecari shqiptar, Santino Xhyra u vra në Bari të Italisë, në vendin e njohur si Leberta, e njëjta zonë ku 7 vjet më parë u ekzekutua po me tre plumba një tjetër shqiptar, Florian Mesutin. Këtë të fundit e nderoi i gjithë qyteti për faktin se vdiq duke mbrojtur nga dhuna një grua dhe djalin e saj të mitur. Për Mesutin u vendos një pllakatë; ai u vra vetëm sepse për të mbrojtur gruan e panjohur grushtoi pa e ditur djalin e një mafiozi. Pak dihet sakaq për arsyen e atentatit ndaj viktimës së fundit. Mediat italiane thonë se për momentin, hetuesit e kanë përjashtuar mundësinë që vrasja të ketë lidhje me krimin e organizuar, por verifikimet vazhdojnë. Sipas tyre, 28 vjecari, të cilin e qëlluan pranë shtëpisë, nuk ishte një emër i njohur në botën e krimit, edhe pse kishte ndonjë precedent të vogël penal.