Kryeministri Rama zgjodhi të bëjë një vizitë dyditore në Itali, në përkujtim të 30 vjetorit të eksodit masiv të shqiptarëve. Rama është pritur pasditen e kësaj të premteje në Bari nga ministri i Jashtëm i Italisë Di Maio dhe Guvernatori i rajonit të Puglias, Michele Emiliano. Në fjalën e tij ministri italian i Jashtëm Luigi Di Maio u shpreh se ato pamje të marsit 1990 do të mbeten përgjithmonë të gdhendura në kujtesën kolektive të të gjithë Italianëve. "Fillimi i viteve 1990 ishte një periudhë ndryshimesh dramatike për Shqipërinë. Shembja e asaj që kishte mbetur nga regjimi komunist dhe ekonomia e dobët i shtyu mijëra shqiptarë, veçanërisht të rinjtë dhe më të arsimuarit, të largoheshin, të emigronin dhe të fitonin lirinë që iu ishte mohuar për shumë kohë. Imazhet e atyre ditëve, turmat e grumbulluara në anije, do të mbeten përgjithmonë të gdhendura në kujtesën kolektive të të gjithë Italianëve. Shqiptarët, pasi u përballën me një lundrim sa të shkurtër, aq edhe të pabesë, mbërritën në Itali të rraskapitur” Kryeministri Edi Rama u shpreh se shqiptarët nuk do t'i harrojnë kurrë bujarinë e jashtëzakonshme italiane. "Ato momente të vështira që vënë në provë miqësinë e vërtetë. Janë tashmë 30 vite kur shqiptarët erdhën në këtë anë të detit. Në këto 30 vite ndodhën shumë gjëra por ishte shumë e madhe bujaria e Italisë. Kjo periudhë e historisë sonë nuk do të harrohet kurrë. Uroj që ju të mos keni nevojë kurrë për ne por sa herë të keni nevojë ne do të jemi aty për ju. Gjysmë milioni shqiptarë janë sot në Itali dhe kontribuojnë çdo ditë në këtë shtet. Për ne siç na vjen natyrshëm italishtja është gjuha jonë e dytë dhe ne jemi përpara të gjithë studentëve të tjerë, holandezë apo italianë. Kjo është bërë e gjithë e mundur për shkak të shpirtit italian"