I nominuar 15 herë për çmim Nobel, kolosi dhe gjeniu i letrave shqipe, Ismail Kadare mbylli sytë përgjithmonë mëngjesin e kësaj të hëne në moshën 88-vjeçare. Ai ishte romancier, poet, eseist, skenarist dhe dramaturg. Kadare u lind më 28 janar 1936 në lagjen Palorto të Gjirokastrës, në një familje bektashie. Kur u vendos regjimi komunist në Shqipëri ai ishte vetëm 8 vjeç. Në moshën 13-vjeçare zbuloi Makbethin e Shekspirit, dhe kështu i lindi dashuria për letërsinë. Stili i Kadaresë është krahasuar me atë të Nikolai Gogol, George Orwell, Gabriel García Márquez, Milan Kundera dhe Balzac. Duke jetuar në Shqipëri gjatë një kohe censure të rreptë të regjimit socialist, Kadare sajoi manovra për të mposhtur censurizmin komunist që kishte ndaluar tre nga librat e tij, duke përdorur mjete të tilla si shëmbëlltyra, miti, fabula, përralla popullore, alegoria dhe legjenda, satirë dhe mesazhe të koduara.