Kumrie Zika, 39 vjeçe, është arrestuar në Tiranë pasi dyshohet se punësohej në subjekte të ndryshme me qëllim vjedhjen e xhirove ditore. Policia thotë se deri tani janë dokumentuar 5 raste vjedhjesh, ndërsa hetimet vijojnë për të zbardhur edhe raste të tjera. Sipas hetimeve, 39-vjeçarja punësohej përkohësisht në biznese të ndryshme në Tiranë dhe, pasi krijonte mundësinë për të pasur akses te paratë, dyshohet se vidhte xhiron ditore përpara se të largohej nga subjekti. Për rastet janë mbledhur prova gjatë hetimit, ndërsa 39-vjeçarja ishte shpallur në kërkim. Ajo u kap nga efektivët e Forcës së Posaçme “Shqiponja” në ambientet e një lokali në Tiranë. Pas arrestimit, materialet procedurale iu referuan Prokurorisë për veprime të mëtejshme. Ndërkohë, grupi hetimor po punon për të verifikuar nëse 39-vjeçarja është e përfshirë edhe në vjedhje të tjera të kryera në subjekte të ndryshme në Tiranë.