Që prej datës 4 maj kur Gjykata e Lartë ndryshoi standardet e vendosjes së masës arrest me burg, në Gjykatën e Posaçme të shkallës së parë, në tre javë janë depozituar 12 kërkesa për zëvëndësimin e masës së sigurisë Me vendimin unifikues të Gjykatës së Lartë e cila kërkon që heqja e lirisë të jetë opsioni i fundit, personazhe të njohur të paraburgosur, kërkojnë rishikimin e masës së tyre. Mes tyre, ish zyrtarët e lartë, Ilir Beqaj, Mariglen Qato apo Ervis Berberi, kërkojnë që gjykata të zëvendësojë masën e arrestit në arrest shtëpie, detyrim paraqitje, apo garanci pasurore. Vetëm dy ditë më parë, kërkesa e ish kreut të Autoritetit Rrugor Shqiptar u rrëzua, me arsyetimin, si e pabazuar në ligj dhe në prova. Ish ministri Ilir Beqaj i cili mbahet në paraburgim për çështjen e “Saspac”, këmbëngul se duhet të lirohet nga masa e arrestit me burg, duke ofruar edhe 20 mijë euro garanci pasurorë, ndërsa kërkesa e tij nuk është shqyrtuar ende.