Deputetja e Partisë së Lirisë, Erisa Xhixho ka reaguar ashpër lidhur me trajtimin e ish-presidentit Ilir Meta nga qeveria shqiptare. Ajo krahasoi situatën me atë në Rusi, duke theksuar se në Rusi, Putin nuk ia hoqi Navalnyt lirinë e shprehjes. Sipas Xhixhos ish-presidenti Meta, sipas saj është izoluar maksimalisht dhe i është mohuar e drejta për të komunikuar me mediat. “Ndryshe nga regjimi i Putinit, ai i Edi Ramës të heq të drejtën e fjalës, në emër të një pushteti që nuk pranon kritika. A mund të flasim për Shqipëri Europiane, kur Tirana sillet më keq se Kremlini? As në 2030, as kurrë! Raporti i Avokatit të Popullit e thotë qartë se komunikimi me mediat është në bazë të parimit për të drejtën e shprehjes dhe transparencën.Respektimi i Konventës Europiane për të Drejtat e Njeriut nuk është opsion–është detyrim ligjor. Zbatimi i 9 rekomandimeve të Avokatit të Popullit është gjithashtu detyrim”. Deputetja përfundon mesazhin e saj duke theksuar se një Shqipëri europiane duhet të ndërtohet mbi themelet e demokracisë dhe të shtetit të së drejtës.